Garoowe,(insidesomalia.org)- Madaxweynaha Maamul Gobaleedka Puntland ayaa warqad uu ka soo saaray Xafiiskiisa magaalada Boosaaso wuxuu shaqadii kaga eryay Mid ka mid ah kuxigeenada ciidamada Booliska ee Puntland, waxaana xilka laga qaaday Maxamed Xaaji Aaden oo ka mid ah Kuxigeenada ciidamada Booliska.

Warqadan ka soo baxday Xaafiiska Madaxweyne Cadde Muuse ayaa ku taariikheysneyd maanta oo bishu ku beegan tahay 11-ka Octoobar, waxa ayna warqada uqorneyd Sidan.

Xeer Madaxweyne Lr. 104/08 ee 11th October, 08 kuna saabsan Xil-ka-qaadis Taliye-ku-xigeenka Ciidanka Booliska.

Madaxweynaha  Puntland Markuu Arkay Dastuurka Dowlad Goboleedka Punt Land qodobkiisa 54aad faqradiisa 19aad Markuu Tixgeliyey Talo soo-jeedinta Wasiirka Amniga iyo DDR Markuu Arkay: Xaaladda Nabadgelyo ee wadanku ku sugan yahay Wuxuu Xeeriyey.

1) Waxaa Xilkii laga qaaday Maxamed Xaaji Aaden oo ahaa Taliye-ku-xigeenka Ciidanka Booliska Puntland.

Madaxweyne Cadde Muuse ayaa ucuskaday shaqo ka qaadidan markuu arkay talo soo jeedin ka timid Wasiirka Amniga ee Puntland iyo sidoo kale markuu xeeriyey sida loogu baahan yahay amaanka Puntland oo wax laga qabto, waxaana la sheegayaa in dhawaan booskaasi la buuxin doono.

Xeerkan wuxuu dhaqangalay maanta uu saxiixay Madaxweynaha maamul gobaleedka Puntland Maxamuud Muuse Xirsi, shaqo ka qaadidan Madaxweyne Cadde Muuse ayaa ku soo beegmaysa xili maalmihii ugu dambeeyey ay dadka Puntland ku dhaqan ay cabasho ka muujinayeen amaan la'aanta ka taagan deegaanada Puntland.